Theunis Engelbrecht slaan die spyker op syn kop. Daar is geen geskakeerde blik op Steve nie. Hy is as openbare persoonlikheid ’n verneuker, vader van vele, en wat nog.

Ek het ’n omstrede siening van Steve. Agter die openbare persona is daar ’n besondere man.

Die sanger (wat Neil Diamond uitmuntend vertolk), onderhoudvoerder, digter, kommentator, bloggis, wat nog, ontmoet ek ’n paar jaar gelede in ’n boekwinkel nadat ek ’n uiters kritiese resensie oor sy bundel geskryf het. My slotakkoord: as Steve kan dig, kan ek sing. Rapport het destyds my in spotprent voorgestel met so ’n kitaartjie in die hand.

Hier staan ek; doer staan Steve. Hy kom nader: "Mag ek maar met jou praat? Of praat ons net in die pers?"

"Natuurlik mag jy met my gesels!"

In lewende lywe is Steve ’n uiters sjarmante, intelligente mens. Ons het ’n keer gaan uiteet en ek was baie geïmponeer met die feit dat hy elke keer wanneer ’n bewonderaar tafel toe gekom het, vriendelik en innemend was. Hy is belese en goeie geselskap.

Theunis Engelbrecht wys op die geskakeerdheid van ’n komplekse mens en hy gebruik tereg Erica Jong as uitgangspunt:

In this age of electronic sound bites and media stereotyping, few public figures are allowed complexity, complication, or chiaroscuro. - Erica Jong, The Devil at Large

Joan Hambidge

Source: http://www.litnet.co.za/cgi-bin/giga.cgi?cmd=cause_dir_news_item&cause_id=1270&news_id=54917&cat_id=160